الأحد، 24 أبريل، 2011

يوميات ثائر فى التحرير


ليلة 25 يناير:-
كنت قاعدة على الفيس بتكلم مع واحدة قربتى فبتقولى: هتروحى التحرير بكرة
قلتها: "لا"
قلتلى: ليه ....؟؟
علشان انا مش مقتنعة اصلا باللى هيحصل .... هم ليه هيعملوا مظاهرات دلوقتى ...؟؟ ايه الحدث الاجل اللى يخلى البلد كلها تثور علشانه دلوقتى ولا حاجة غير ان تونس عملت ثورة واحنا عايزين نعمل زيها انما ايه السبب مافيش المرادى ........ كان عندنا اسباب كتير مش تخلينا نثور بس دى تخلينا نولع فيهم واخرهم انخبات مجلش الشعب اللى اكتسح فيها الحزب الوطنى - سابقا- وخرج علينا اباطرته يقولوا ان دى ارادة الشعب وان الشعب كسب باغلبية ساحقة وكانت الكلمات اكثر من مستفزة وصمت الشعب ولم ينطق ببنت شفه انا ايه اللى حصل دلوقتى يخلى الشعب يعمل مظاهرات غير ان تونس عملت ثورة ........ واتبعت كلامى قائلة وبعدين فى حد هيعمل ثورة يروح يقول للحكومة يا حكومة والنبى خدى بالك احنا يوم 25 هنجمع كلنا وهنعمل ثورة والتجمع الساعة كذا والتجمع فى المكان الفولانى دى مش ثورة دول بيهزروا
قلتلى : المهم الواحد يعمل اللى عليه ......
قلتلها : طب انت نازلة بكرة
قلتلى: نفسى بس بابا مش راضى علشان انا بنت
قلتلها : ياعم سيبك دى مش ثورة انا مش هنزل وخلاص وخلص الحوار وقمت انا .

يوم 25 يناير صباحا قناه الجزيرة تنقل خبر ان هناك مظاهرات فى ميدان التحرير وان الامن يتحلى بظبط النفس والمتظاهرين سلمين ثم اعرف ان هناك اناس اعرفهم فى الميدان الان والقنوات تنقل ان الوضع ما زال مستقر نسبيا المتظاهرون يعلنون نيتهم للبيات فى الميدان ......"نقلا عن روايه احد المتواجدون فى الميدان " تبداء الشمس بالمغيب وقوات الامن مازالات ثابته والمتظاهرون متمسكين بالبيات وفجاءة تتغير الوجوه وتختفى قوات الامن المركزى وتظهر اجسام ووجوه اكثر حدة وصرامة " القوات الخاصة " دى ناس مش بتتفاهم يحكى انه سأل ظابط القوات الخاصة انتوا كنتوا بتقولوا دول شوية عيال سيس لما يجى وقت الغداء هيروحوا يكلوا بس احنا مش مروحين رد قائلا هتروحوا يابابا ...... رد نروح مين احنا بايتين هنا ....... قاله هنشوف الساعة 12 مش هيبقى فى كلب فى الميدان
وهنا بداء استخدام العنف القناب المسيلة للدموع والرصاص المطاطى .......... وبالفعل عندما دقت الساعة معلانة الثانية عشر ليلا كنت ترمى الابره فى الميدان ترن لم يتبقى فرد فى الميدان وبهذا انتهى يوم 25 بمغادرة المتظاهرين للميدان على اتفاق بالعودة غدا على ان تكون مظاهرة ضخمة يوم 28
عندما سمعت ماحدث فى اليل قلت لا دة استهبال رصاص وقنابل لا يعنى لا وهنا قررت المشاركة
والبقيه تاتى